تاريخ سوره سينده آذربايجان قادينلاري ايستر اؤز ارلري ايله، ايسترسه ده اؤزلوكلرينده قانلي - قادالي دؤيوش مئيدانلاريندا، بول - بول حماسه لرين ياراديجيلاري اولموشلار كي، تاريخ صحيفه لريميز بونلارين بير سيراسينا اؤز سينه سينده اؤيونه، اؤيونه يئر وئرميشدير. بو تورپاقدا اولدوقجا قادينلارا حؤرمت گؤزو ايله باخيلميش و بير سيرا يابانجيلار كي، قاديني نفر واحيدي ايله اؤلچوب و «زن و اژدها هر دو در خاك به» دئميشلر، باخيلماميشدير. زنگين و بير چوخ حيصصه لري قيزيل قانلا يازيلميش تاريخيميزده قادينلارين روللاري بعضي يئرلرده كيشيلردن آز اولماميش و بوتون ساحه لرده گاهدان قاباقجيل دا اولموشلار. اؤرنگ اولسون دئيه دؤيوش مئيدانلاريندا بابكين حايات يولداشي كلدانييه، كوراوغلونون نيگاري و نبي نين هجري اونلارلا بيرگه دؤيوشلرده ظفرلر قازانميشلار. تانباكي حركاتيندا هله ده آدي چوخ حؤرمتله ياد اولان زئينب پاشا، اؤز قهرمان يار يولداشلاري ايله خالقين دار گونونده ياغيلارين باشينا نه اودلار تؤكموشلر. شاعير ز-اميرلو دؤيوشچو قادينلاريميزن پايين آشاغيداكي شعرده گؤزه ل و لاييقينجه تصويره چكميشدير:

اسكي زمانلاردان بيزيم ائللرده قادينلارا بوللو، حؤرمت وارايميش
آنايا، گلينه، قيزا هر زامان توكه نمز ده يرلر، عيززت وار ايميش
تاريخ بويو اولو آتا باباميز آنا ايله تانريني، حاقلي بيلميشلر
بير تانري اؤنونده اييليب، داها آنالار اؤنونده، بير اييلميشلر
ازلدن ديللرده مثل اولموش كي:«آسلانين اركه يي، ديشيسي اولماز»
دئييبلر قادينا ده ير وئرمه سك ميللتين ده يرلي كيشيسي اولماز
اوندا كي باشقالار، قيز اوشاقلارين ديري، ديري تورپاق آلتدا قويلارميش
هامان چاغدا بيزيم ائل اوباميزدا بخت اولدوزو، آتا قيزين سانارميش
اوندا كي باشقالار، آروادي قيزي ساتيرديلار قول تك، پولا بازاردا
ياشاياردي آزاد بيزيم آروادلار ديز به ديز شرفله، ان ايفتيخارلا
تاريخلرده پارلاق بير اولدوز كيمي تومروس آناميزين، آدي قالميشدير
او تومروس كي تبريز، آنا وطنيم ايفتيخارلي آدين اوندان آلميشدير
كوراوغلو نبي يه، سس ووروب سسلر نيگارلار، هجرلر، زينب پاشالار
بوردا زنانلار دا كيشيلر كيمي ايستيبداد كؤكسونه سونگولر چالارلار
هونر عالمينده داييم پارلاييب يوزلرجه مه هستي، يوزلرجه پروين
نه گؤزل اثرلر ياراديب بونلار ظاهيري ساپ - ساده معناسي درين
آزاده كيشيلر - آزاد قادينلار ياشاديب ياشاسين آذربايجانيم
اودلار، ديياريسان، شرف يوردوسان سن كيمي آنايا، قورباندير جانيم.

مشاهير تركهاى ايران : تئللي زري خانيم

اوست سطيرلرده دئديييميز كيمي بيزيم تاريخ، جومورودلردن دالغالانير. ايندي بورادا اونلارين بير باشقاسيندان دا آد چكمك ايسترديم. بو جسارتلي قادين «تئللي زري» اولموشدور كي، مشروطه اينقيلابيندا اوغلانلارلا بيرگه دؤيوش سنگرلرينده ياغيلارين علئيهينه موباريزه آپاريردي كي، ظاليملرين ميراث گولله لرينه توش گلير. باشقا موجاهيدلر بو جنگ پالتار گئين دؤيوشچونو دينج بير يئره آپاريب اونون يارالارينا داوا - درمان ائتمه قرارينا گليب، اونون حرب گئييملرين چيخارداندا مانئع اولوب و ايسته يير كي ستتارخان گرك بورادا اولسون. بو خبري قوچاقلار ستتارخانا يئتيرجك هامان، ستتارخان او دؤيوشچونون سون چاغلاريندا باشي اوستونه يئتيشمك همان اولور. شاعير محمد ابراهيم زاده «دنيز» بو دستاني گؤزلجه نظمه چكميشلر. بونو دا قئيد ائتمك يئرسيز اولماز كي، همين داستانلا، ماراقلانانلاردان بيريسي ده ائل و خالقين شاعيري سؤهراب طاهيردير. سؤهراب موعللمين بو شئعري بير نئچه دؤنه چاپ اولدوغونا گؤره اوندان واز كئچيب، محمد دنيزين شئعرين بيرگه اوخوياق:

كؤنلوم يئنه بير ايز آييرير دويغو تئليندن
ايستر يئني بير صحبت آچا آذر ائليندن
سؤز باشلاياراق بير دؤنه تبريز شهريندن
مشروطه ديلاورلرينين بول هونريندن
مشروطه ده بير قيز گئيينيب جنگ ليباسين
قانلا بوياييب اللرينه الوان حناسين
تومروس ساياغي ايلهام آليب اؤز ديياريندان
تا وار نفسي ائتدي ديفاع ناموس - عاريندان
گؤلله ده يره ك، سينه سينه قاني جالاندي
يالنيز يادا باش ايمه يه ره ك سرت يارالاندي
ائللر قوچاغين تئز گؤتوروبلر ائوه ساري
ملحم قويالار يارهسينه ائتمه يه زاري
هر نئتديلر، او قويمادي سويسونلا ليباسين
تا ياره سينين اؤستونه قويسونلا داواسين
ستتارخان او دم تئز يئتييشيب سؤيله دي اوغلوم
آي ويجداني پاك قلبي تميز نيييتي دوغروم
عيللت نه دي كي قويموسان ائتسينله طبابت
آيا بو ايشه واردير الينده يئني عيللت؟
او ائل بالاسي اوز توتاراق سؤيله دي سردار
تئز سن بوراني خلوت ائله سنله سؤزوم وار
ستتارخان او حال خلوت ائديب تئز او مكاني
اوز توتدو اوغول وار نه سؤزون سؤيله بو آني
اوول يارهلي عسگر دئدي ائل اولدوزويام من
اوغلان دئييلم ائل بالاسي ائل قيزييام من
ستتارخان ائشيت جك بو سؤزو بير حالا قالدي
رنگي ساراليب تئز قيزين آدين خبر آلدي
«آدين نه دير آي ائل قوچاغي قلبيمي دلدين
من كي ديرييم اؤلمه ميشم سن نييه گلدين؟
تئللي زري سسلندي وطن عسگرييم من
اوغلان دئييلم تورك قيزي، تئللي زرييم من
تئللي زرينين سردار ائله كي سوروب حالين
چيخدي ائشييه سسله دي فورن اؤز عيالين
سسلندي قادين گل بو قيزين باغلا ياراسين
چوخ سعي ائله قويما اؤله بو خالق بالاسين
تا اؤ يئتيشسينجه زري آراميني آلدي
آذر ائليني مين كدهره مين اودا سالدي
جوت گؤزلري اولدوز تك آخيب گول كيمي سولدو
بيرليك سؤزونو خالقا دئييب سونرا اؤلوبدو
ائل آشيغي چال منصوري غملر تزه لندي
آذر بالاسي تئللي زري قانه به لندي
چالخاندي «دنيز» قان دولوسو اولدو بو چوللر
مينلر قوچاغين قاره ساچين هؤردو بو ائللر

مشاهير تركهاى ايران : بايرامقولو قيزي سرييه خانيم

هله 21 آذر جريانيندا اردبيلدن قالخان و ايستيبداد علئيهينه قهرمانجا موباريزه آپاران بايرام قولو قيزي سرييه خانيمي، گؤرنلر، اونون جسارت و شهامتيندن سؤز -صؤحبت آچاندا، سانكي ايكينجي زئينب پاشادير ذيكر ائتميشلر. بو جسارتلي و تاسسوفله آدي ايتگين قالان قادين تكينه 5 گون دوشمنين موحاصيره سينده قالديقدا يئنه ال - قولو سووومادان سون گؤلله يه قدر آتيشميش آنجاق نه ايسه ياغيلارين يالانلاري و ياغلي ديللرينه اينانيب سنگردن چيخديقدا، نامردجه سينه اونو قتلگاها گؤنده ريب گؤلله ده مينه وئرنده جللادلارا دئيير: تاريخ سيزلره نيفرين ائدهجك، قاتيللره نجات يولو باغليدير. آذربايجانين رشيد بالالاري منيم اينتقاميمي سيزدن آلاجاقلار. آذربايجان آزاد اولاجاق».

«آزادليق يولوندا مبارزه» كيتابيندا بو قادينا عاييد آشاغيدا كي سطيرلر قئيد ائديلميشدير:«خلق آزادليغينين كئشيگينده مردليكله دايانان اؤز عينادچيليغىيلا دوشمني حئيرته سالان ايگيد ثومرين اوغوللاري ايچريسنده آذربايجان خلقينين قهرمان قيزي سرييه ده ووروشوردو. او، حيات يولداشي علي ايله بيرليكده، اونونلا چييين - چييينه بير سنگردن آتش آچيردي. لاكين او، هم موحاصيره ده، هم ده فيشنگي قورتاماقدا ايدي. بونا باخماياراق او، دوشمنه تسليم اولماق ايسته ميردي. خايين دوشمن ثومرين فداييلرينين، ائلهجه ده سرييه خانيمين قارشيسينا قورآن گتيرير، اونا ال باسير، آند ايچير «شرفله» سؤز وئرير و حاكيم طبقه لرين يوز دفعه لرله ال آتديقلاري آلچاق حيله و آلداتما مئتودوندان ايستيفاده ائدير. آز سونرا قورآنا باسيلميش اللر ثومرين فداييلرينين، او جومله دن شاهسئون ائللرينين قهرمان قيزي سرييه نين قانىيله بويانير. قهرمان فدايي سرييه اؤلدورولمه ميشدن اوول بارماغيني جللادلارين گؤزونون ايچينه سيلكه له يه ره ك «بو سيزين اوچون هونر دئييل، تاريخ عهد و پئيمان پوزانلاري نيفرتله ياد ائده جكدير»! دئميشدير. او سؤزونو دوام ائتديره ره ك اوجا سسله بئله علاوه ائتميشدير: «آذربايجانين ايگيد اوغوللاري منيم قانيمي يئرده قويماياجاقدير! شهيدلر قاني آزادليق آغاجين سوواراجاق» بو نزاكتلي و شرافتلي قادين «اردبيلين ثومرين قصبه سينده 1325 ينجي ايلين آذر آيينين 26 ينجي گؤنو ناهاردان سونرا ساهات 6 دا بير ده ييرمانين قيراغيندا تاسسوفله شهيد اولونموشدور» و بئله ليك له «18 نفر فدايي ايله شاهسئون قيزي سرييه، خانلارين سيلاحلي دسته لرينه 5 گون موقاويمت گؤستريب اؤلومو مردليكله قبول ائتديلر.» يازيقلار اولسون كي بو رشيد و ديلاور قاديندان تاريخلري آراييب، آختاراندا بير شئي گؤزه ده يمير. البتته بونون اساس عاميلي بو اولابيلر كي، ميللي حوكومت دئوريلنده ن سونرا، اوندان يازماق نئجه دئييرلر گوج آپاران ايشلردن ايدي و سونرالاردا او دؤورون آداملاري قيريليب قورتولدوقدا ايش داهاچتينلشميشدير. بئله ليك له سرييه خانيم دا اؤزوندن قاباق ظولم و ظاليم علئيهينه موباريزه آپاران موباريزلر كيمي تاريخه قوووشدو و اؤز گؤستردييي شرافت و شوجاعتي ايله تاريخيميزين بزكليلريندن بيريسي اولور. نئجه كي زئينب پاشا، هجر خانيم، آتلي شاه به ييم، تئللي زري، عظمت خانيم، پروين اعتصامي، گنجه لي مه ستي، نيگار خانيم، خورشيد خانيم و... اولموشلار. يازيميزين سونوندا اوستاد حميد سخامئهرين منيم خواهيشيمله يازديغي «آسلان سرييه» باشليقلي شئعرين بيرگه اوخوياق:

گؤردو اؤز يوردون٫ ائلين زار و پريشان سرييه
غئيرتي چكمه دي گؤرسون ائله نالان سرييه
ظاليمين بلكه توفنگيله سؤكه سينه سيني
ويجدانيله اؤز آرا باغلادي پئيمان سرييه
ائتمه يه جنگ فيشنگيله توفنگين گؤتوروب
مرد-ى مردانه اولوب عازم-ى مئيدان سرييه
عرصه تنگ اولدوغو حالدا آتيشيب دوشمنيله
دوشمنين باغريني بئش گون ائله ييب قان سرييه
تا فيشنگي واريميش سنگريني بوشلاماييب
صوولتيله ائله ييب دوشمني حئيران سرييه
چوخ دؤيوشدن سورا آخيرده فيشنگي قوتاريب
ائله ييب جانين آذربايجانا قوربان سرييه
(توپراق آلتيندا زن و اژدهاني قويلويانا)*
كيشيليك رسمين ائديب اوندا نومايان سرييه
قوربانام منده «سخا» سرييه كيمي قهرمانا
كيشيدن ده باشيميش چونكو او اينسان سرييه
آسلان آسلاندي دئييبلر اولماز اركك يا ديشي
يئري واردير اونا تاريخ دئيه آسلان سرييه

قايناقلار و ايضاحلار
1- "آزادليق يولوندا مبارزه"، بيرينجي جيلد، ص 19
2- "مهد آزادي" گؤنده لييي، شاعير ز-اميرلو- نون شئعري همين گؤنده ليك دن گؤتورولموشدو.
3- حؤرمتلي شاعير محمد دنيزدن شئعرين بيزيم ايختياريميزدا قويدوقلارينا گؤره اؤز ميننتدارليغيميزي بيلديريريك.
4- "از زندان رضاخان تا صدر فرقه دمكرات آذربايجان"، علي مرادي مراغه اي، باهار 1382، تهران، اوحدي، ص 516
5- سالماسلي عاليم دوستوم حؤرمتلي علي اصغرغفورينيا جنابلارينين، لطفعلي اردبيلي (فلكي)نين سرييه خانيم حاققيندا ايكي سطيرليك يازيسين بيزه لوطف ائتديكلرينه گؤره تشكور ائديريك.
6- "گذشته چراغ راه آينده است". پژوهش گروهي: جامي، ويراستار: بيژن نيك بين، چاپ دوم پاييز1371 - تهران نشر نيلوفر.
* - "زن و اژدها هردو در خاك به- جهان پاك از اين هر دو ناپاك به"حكيم فردوسي طوسي، ايرانين آدليم شاعيري.

شيخ محمد خيابانى در سال 1297 هجرى قمرى در خامنه از توابع تبريز به دنيا آمد . مدتى در روسيه در تجارتخانه پدرش مشغول كار بود. در زمان محاصره تبريز توسط قشون محمدعليشاه , جزو مجاهدين مدافع شهر بود. در دوره دوم مجلس شوراى ملى از تبريز به مجلس راه يافت و عضو حزب دمكرات بود.پس از بستن مجلس به روسيه و سپس به تبريز آمد, بعداز انقلاب 1917 در روسيه , فرقه دمكرات را فعال نمود. درزمان حضور قواى عثمانى در تبريز مدت دو ماه در زندان بود. خيابانى از مخالفين سرسخت امضا قرارداد خائنانه ايران و انگليس توسط انگلوفيل معروف وثوق الدوله صدراعظم وقت بود. پس از امضا اين قرارداد اعتراضات گسترده اى بويژه در بخشهاى شمالى ايران بوقوع پيوست, از جمله قيام دمكراتهاى آذربايجان به رهبرى خيابانى. اين قيام در سال 1338 قمرى(1920 ميلادى) با خدعه ونيرنگ و تا حدودى برآورد غلط دمكراتها كه حاكم منتصب تهران يعنى مخبرالسلطنه را عليرغم ارتباطاتش با نيروهاى مرتجع و قزاق و انگيس به شهر راه دادند, بطرز وحشيانه اى سركوب گشته و خيابانى بطرز فجيعى به قتل رسيد

مشاهير تركهاى ايران : شيخ محمد خياباني

Eldar@Duzgun.net

هر گون خياباني نطق سؤيله يير ،
آرزوسون ، آمالين هي بيان ائدير .
توركجه دانيشيردي فصاحت ايله ،
وارلي توركجه ميزده بلاغت ايله .
دينله ينلر بوتون حيران اولوردو ،
عجم حناسي نين رنگي سولوردو.
گؤزل دانيشيردي توركجه ميزي او ،
اوجاباش ائديردي هر گون بيزي او .
قيام قالديرميشدي شانلي توركجه ميز ،
اگميردي تهرانا قهرمان تبريز .

ح.دوزگون

شيخ محمد خياباني مشروطه دؤورونون بؤيوك يازيچيلاريندان ، دانيشانلاريندان و عالم لريندن ايدي . او مملكتيميزين آزادليق و استقلالي اوچون چوخلو فداكارليقلار ائتميشدير، بو بؤيوك كيشي آذربايجانين و ايرانين افتخارلاريندان ساييلير . خياباني نين قوه لي يازي لاري و تاثيرلي دانيشيقلاري اولموشدور. اونون دانيشيقلاريندان آزادليق روحو ، شجاعت و ملي غرور حسي ائشيدنلرده يارانيردي . اونون علمي دانيشيقلاريندان سونرا ، نظري ارشاداتي عموم خلق طرفيندن قارشيلانيردي .بو مبارزين شهادتي نين ايل دؤنومو مناسبتي ايله اونون ياشاييشينا قيسا بير باخيشدا ، اونون تانيتديرماغينا چاليشاجا غيق . محمد خياباني ، حاج عبدالحميد تاجر اوغلو ، 1297 – نجي قمري ايلينده تبريزين ياخينليغيندا كي خامنه قصبه سينده آنادان اولموش و 1338-نجي ايلين 29 ذي الحجه آييندا قيام حادثه سينده تبريز شهرينده شهيد اولدو . محمد اولجه آتاسي نين تجارتخاناسيندا اقتصادي تعليمات گؤرموش ، سونرا لار تبريزه گئتميش و ايكينجي تحصيليني تبريزده مكمل ديني ، دنيوي تعليمات گؤرموش ، فقه و اصول اوخوماقدان علاوه ، رياضيات ، طبيعي علوم ، اولدوز تانيما و باشقا علمي ساحه لرده مهارتلر قازانميشدير . شيخ محمد خياباني گنجليك زامانيندان سحرلر تبريزين جامع مسجيدينده و آخشاملار ايسه خياوان محله سينده يئرلشن كريمخان مسجيدينده امامت ائدردي . حاج آقا پئشنماز خامنه اي ، شيخ محمدين قايين آتاسي رحمته گئتديكدن سونرا ، خياباني بو مسجيدين پئشنمازليغيني اؤز عهده سينه آلميشدير . مختلف پئشه لرده چاليشان محمد خياباني ، مشروطه انقلابي دؤورونده سياسي حياتا آدديم قويموش ، انقلابين فعال اشتراكچي لاريندان اولموش ، محمد علي شاه تبريز شهريني محاصره ائتديگي زامان مرحوم خياباني مجاهدلر و آزاديخواهلارلا بير سنگرده استبدادي قوه لرله مبارزه لر آپارميشدير . او تبريزين خياوان محله سينده اوز وئره ن ووروشمالارين بيرينده گؤسترديگي قهرمانليق و شجاعتله خصوصي فرقلندي ، او آذربايجان ايالتي انجمني نين فعال عضولريندن ايدي و انقلابدان سونرا آذربايجان ايالتي نين ملي مجلسي نين ايكينجي دؤوره سينده نماينده سئچيلميشدير ، امما مجلس تعطيل اولاندان سونرا نئچه ايللر سورگون دوشموش ، مشهد و سونرا قفقازا ساري گئتمه يه چاره سيز قالميشدير . 1332- نجي قمري (1293شمسي) ايلينده تبريزه قاييتميش و تجارتله مشغول اولان خياباني گيزلي فعاليتلره باشلاميشدير ، اونلارين ايشلري 1335 – نجي قمري (1296 شمسي) ايلينده آچيغا كئچدي و شيخ محمد خياباني باشچيليق ائتديگي آذربايجان ايالت كميته سي تشكيل تاپدي و اونلارين ايشلرين توسعه وئرمكده سراب ، اردبيل ، زنگان و اورمو كميته لري ده ياراندي . خياباني نين رهبرليگي ايله ‹ تجدد › نشريه سي نين ياييلماسي باشلاندي . دؤرد ايل عرضينده 202 سايي چيخميش نشريه نين سايي لاري نين چوخو ندا (م- خ)امضاسي ايله خياباني نين باش رداكتورلوغو و يازي لاري ايله نشر ائديلميشدير ،‌فارس ديلينده نشر اولان بو قزئته تهران و اؤلكه ميزين باشقا شهرلرينه ده گؤندريليردي . 1335-1338نجي قمري ( 1299 – 1296 شمسي) ايللرده ، خياباني ايرانين حاكميت دايره لري نين ضد خلق فعاليتينه و امپرياليست پرستليك سياستينه ، او سيرادان انگلستان دؤولتي ايله امضالاديقلاري 1919 –نجو ميلادي ( 1298 شمسي) سازشينه ، قارشي چيخاراق ، مشروطه انقلابي دؤورونده الده ائديلميش اساسي قانونون حياتا كئچيريلمه سي ، تكميل لشديرمه سي اوغروندا ، آذربايجاندا گئنيش حركاتا باشلاميش ، بو مبارزه ني رهبرليك ائديب 1299-نجي شمسي ايلينده تبريزده قيام ائتميشدي . قيامين حياتا كئچيريلمه سي ، نظري جهتدن خيابانينين ‹ تجدد مسلكي › نه اساسلانيردي ، ‹ تجدد› يئنيليكچي مسلكي ، امپرياليزم آغاليغينا ، شاه حاكميتي نين ظلمونه قارشي قيام ائدن ، سياسي آزادليقلار ، حقيقي خلق حاكميتي و نهايتا آذربايجان ملي حقوقلاري اوغروندا مبارزه آپاران بير عقيده ، سياسي ـ نظري بير جريان ايدي . بو جريان ، سياسي مبارزه ده ساغ و سول اولمايان ، خياباني دفعه لرله تكرار ائتديگي ، ‹ اورتا خط › گؤتورن بير خيردا جريان ايدي . دوغما دياري آذربايجانلا افتخار ائدن ، بو ديارين يوكسلمه سي و بوردا ياشايان ميلتين يئتگينلشمه سينه چاليشان خياباني ، همين خلقه مراجعتله دانيشيقلاريندا آذربايجانليلاري فعال و قطعي مبارزه يه سسليردي . بئله ليكله خياباني نين باشچيليغي ايله حياتا كئچيريلميش بو قيام ، ايراندا حكم سورن امپرياليزم آغالارينا ، شاهليق قورولوشونا قارشي و آذربايجانليلار و بوتون ايرانليلارين ملي استقلاليتي اوغروندا مبارزه تاريخينده بؤيوك اهميته مالك اولموشدور . تبريزده اوز وئرن بو تاريخي قيام و اونو رهبرليك ائدن شيخ محمد خياباني نين شخصيتي ، آذربايجانليلارين ملي شعورونون انكشافيندا بؤيوك رولو اولموشدور . آلتي آي دوام ائتديگي بو قيام مركزي حكومتين آپارديغي سلاحلي هجوم نتيجه سينده مغلوبيته اوغراديقدا ، خياباني ، حياتي نين سون لحظه لرينه دك مردليك و ديانت گؤسترميشدير . مخبرالسلطنه نين وئرديگي فرمان اساسيندا ذيحجه الحرام 1338-نجي ايلده بير نئچه قزاقين هجومو زاماني اؤلدورولدو . بوندان اولكي گون خياباني دن اجازه ايستنيلدي كي گئديب والي دن اونا امان ايسته نيلسين ، خياباني ايسه جاواب وئرميشدي : ‹ من دوشمن مقابيلينده ديزيمي يئره وورمارام ، من ايران مشروطه انقلابي نين اوغلويام ، من اؤلومو ، تسليم اولماقدان اوستون توتورام .

قايناقلار :
ü شيخ محمد خياباني حماسه سي : حسين دوزگون
ü قيام شيخ محمد خياباني در تبريز : س . علي آذري
ü نطق هاي شيخ محمد خياباني : بهرام خياباني
ü شيخ محمد خياباني ، خروش حماسه ها : مصطفي قلي زاده .