مشاهير تركهاى ايران: عاشيق عبدولعلی
حميد داديزاده تبريزی- دوشنبه ٢ تير ١٣٨٢ – ٢٣ ژوئن ٢٠٠٣
به ياد عاشيق عبدولعلی که از پيش ما به خانه ابدی شتافت، عاشقی که عاشقانه زيست و آثار ماندگاری از خود به يادگار گذاشت. نسل قبل از انقلاب با صدای گرم او آشنايند که دو بيتيها را با ترجمه زنده ياد س. سلطانپور اجرا کرد. درود
(به زبان آذری)عاشيق عبدولعلی ده گئتدی
ائشيتديم عاشيق عبدولعلی ده گئتدی، ائشيتديم عاشيق عبدولعلىنين سازينين سسی کسيلدی، ائشيتديم عاشيق عبدولعلىنين جسدی تورپاغا تاپشيريلدی. والله من نه دئييم بو پاسيفيک دنيزينين کناريندا، يالنيز بونو دوشونورم کى عاشيق عبدولعلى نين سازينين سسينى نه شاهين توپ توفنگی ساواکی سوسدورا بيلمه دی نه ده ايسلامی حاکيملرين فتواسی. عاشيق عبدولعلی حقيقتده بير ائل عاشيقی کيمی ياشادی و آدی ابدی قالدی. عاشيقين وفاتيندان سونرا اونا رحمت ايسته مكدن سونرا سؤزومو عاشيقلارين سؤزىيله دوام ائتمك ايستيييرم .
عاشيق عبدولعلی ده ده دن بيليکه چاتماميشدی
اونا گؤره ده ائلين قدرينی بيليردی.
تبريزين اينالی اتييندن، گجيل قاپيسينا قده ر، تبريز، اهر، کلئيبر،خودافرين و قاراداغ ماحاليندا عاشيق عبدولعلی سينه لرده ياشايير، عاشيق عبدولعلی نورمال٫ منطيقلی و آرام بير اينسان ايدى، سئويملی بير اينسان. آرام کاراکتئرلی. بونا گؤره ده هر بير زامان دومانلی تبريزده عؤموربويو ياشادی، ياراتدی و عاشيقليق صنعتين و هونرينى داها يوکسلتدی. عاشيق عبدولعلی ده گئتدی. او دا قافيله يه قاتيشدی و آدی آذربايجان خلقينين شفاهی ادبيياتيندا ثبت اولدو. اونون يادی خاطيره سی و ايناملی ووجودو بيزيم تاريخيميزده حک اولدو. من ونکوور شهرينده اونون رحمته گئتمه سينى ائشيتديم بير لحظه دوردوم دوشوندوم، خيالا دالديم، فيکره گئتديم و اؤز اؤزومه دئديم ائ وفاسيز دونيا!. سونرا اوستاد شهريارين قاليجی اثری ديليمده سسلندی:
حئيدر بابا دونيا يالان دونيادير
سولئيماندان نوحدان قالان دونيادير
هر کيمسه يه هر نه وئريب آليبدير
افلاطوندان بير قورو آد قاليبدير
هر زاددان اؤنملی عاشيق عبدولعلی نين ووقاری و عاشيقليقا حؤرمتيدير. بونا گؤره او اينسان ايللر بويو چاليشدی٫ سازين سسلنديردی و بو صنعتی گنج عاشيقلارا اؤرگتدی. ايندی ده هله قولاغيمدادير. بير گون تبريز شهرينده عاشيقلار قهوه سينده بير دوبئيتی داغچيلارين عئشقينه اوخودو:
بينه لری چادير چادير
چوخ گئچميشم اؤزوم داغلار
ايلهامينی سيزدن آليب
منيم سؤزوم سازيم داغلار
عاشيق عبدولعلی تورپاق اسيری اولسا دا اونون اثرلری ايللر بويو سينه لرده سسلنه جكدير. تبريزده عاشيق صنعتینی سئوه نلر و اوستادين دوستلاری بوتون آذربايجاندان چوخ حؤرمتلی بير مراسيمله عاشيقی اؤز ابدی ائوينه يئتيرديلر. عاشيق عبدولعلی نين خاطره سی ياشاياجاقدير
مشاهير تركهاى ايران: عاشيق عبدالعلی
anayurdum-tabrizushagi
قوی آغلاييم يانيخلی کؤنلون يارا گونونده
داشدان فغان آلاولار يارين ويداع گونونده
عادت بئله دير کی نئعمت اولان قدرين بيلمه ييب و الدن وئره ندن سونرا افسوس يئييب حسرتين يئييريک. بو يول دا فلک عاشيق صنعتينين تبريزده کی قوجامان نوماينده سينى اليميزدن آلدی .عاشيق عبدالعلی نين سسی هر کيمسه نی وجده گتيرردی ، جنگی کوراوغلو چالاندا کوراوغلو گؤز اؤنونه گلردی و غملی چالاندا دونيانی غم گؤتورردی .سيف الله اوغلو عاشيق عبدالعلی نوری 1318نجی گونش ايلينده قاراداغ ماحالىنين خودافرين بخشىنين جانانلی کندينده آنادان اولوبدور. قاراداغ هر زامان عاشيقلار اوجاغی اولوب و اونا گؤره ده اوشاقلار کيچيک ياشلاريندان بو صنعتين داليسيجا چکيلرلر .
جاوان عبدالعلی عاشيقليق صنعتىنين عئشقينى 18ياشينا قدر اؤز اورگينده ساخلاييب و بو زامان عاشيق خير اللهين يانينا گئدير و اوندان يارديم ايستير. او، سککيزايل عاشيق خیراللهین شاگيردی اولوب و لاييق بير عاشيق اولور آمما اونون عایيله سی اونون يولونون دوامينا مانئع اولورلار و اودا مجبور اولور بیر موددت عاييله سينين گؤزوندن اوزاق اؤز صنعتین دوام ائتسین. آما بير گون کی اؤز کندلرينده بير توی واريميش اؤز عاييله سينين ريضايتين اله گتيريب بو تويدا ؤز هونرین اعلا درجه ده ایفا ائدير و او گون بیرینجی آتديمی بير آدليم عاشيق اولماقدا آتير. سونرالار رادييو دا اؤز هونرين ايفا ائديب و موختليف شهرلر ده کانسئرت لر وئرير. عاشيق عبدالعلی نوری جوما گونو خرداد آيينين ۲سينده ۶۴ياشيندا جفا کار دونيادان گؤز يومدو آمما اونون آدی و يادی يادلاردا قالدی
5:14 PM